Nagpakita sang mabaskog nga performance ang Oklahoma City Thunder matapos nila mapyerdi ang Los Angeles Lakers, 125-107, sa Game 2 sang ila Western Conference second-round playoff series sa National Basketball Association.
Sanday Chet Holmgren kag Shai Gilgeous-Alexander ang nanguna sa Thunder matapos makapuntos sang tig-22 points. Bisan pa nga nagka-foul trouble si Gilgeous-Alexander kag limitado lamang sa 28 minutos nga pagduwa, napadayon gihapon sang Oklahoma City ang ila kontrol sa hampang.
Sa third quarter, nakapanguna pa sang lima ka puntos ang Lakers matapos matawgan sang flagrant-1 foul si Gilgeous-Alexander. Apang samtang yara siya sa bangko, nagpasikad ang Thunder sang 25-7 run nga naghatag sa ila sang daku nga abanse.
Kabahin sang momentum swing ang four-point play ni Jaylin Williams nga nagpalapad sang abanse sang Thunder. Nagdugang man sang puntos sanday Ajay Mitchell kag Jared McCain gikan sa bench.
Sa bahin naman sang Lakers, nanguna si Austin Reaves nga may 31 points samtang nagdugang si LeBron James sang 23 points. Apang indi ini nangin sapat agud mapunggan ang wala pa napierde nga Thunder sa sini nga playoffs.
