Nakahanda ang Office of the Ombudsman nga maghatag proteksyon sa nagbitiw nga mambabatas, anay Ako Bicol Representative Zaldy Co, matapos niya ipahayag nga nagakahadlok siya para sa iya kabuhi.
Sa una nga video nga ginpagwa ni Co sang Biyernes, iya ginbuy-an nga samtang naga-preparar siya magpauli sa Pilipinas, gintawagan siya sang anay House Speaker Martin Romualdez kag ginsiling nga indi siya magpauli kag ginbantaan pa nga patyon siya kon magsugid siya batok sa ila. Ginpahayag man ni Co nga ginamit lamang siya bilang panakip-butas para sa kampanya sang administrasyon kontra korapsyon.
Dugang pa sini, dugay na nga bukas ang ila opisina para kay Co agud maipakita niya ang iya ebidensya, kag kon kahadlok ang rason sang iya paglikaw, ginpasiguro sang Ombudsman nga hatagan siya sang nagakaigo nga proteksyon.
Wala man sang pahanugot ang Ombudsman sa pagpili ni Co nga magpagwa video sa publiko imbes nga magsumiter sang iya salaysay direkta sa opisina.
Gani, ila pa ini nga masusi nga usisaon pareho sang proseso nga ginapasa-an sang tanan nga testigo.
Apisar gin-ako sang Ombudsman nga mabudlay kag masami mabaskog ang proseso, amo ini ang paagi nga masiguro nga ang hustisya lig-on kag indi lamang ginbase sa istorya.
Sa katapusan, gin-awhag sang Ombudsman si Co nga magpauli sa Pilipinas, isumite ang iya salaysay, ipaberipika ang iya mga pahayag, kag magpasakop sa pareho nga proseso nga ginatuman sang tanan
