Ginmanduan sang Office of the Ombudsman ang mga opisyal sang Capiz nga magpasa sang ila Counter-Affidavit kag mga ebidensya bilang sabat sa reklamo nga gin-file ni Fernando F. Garcia Jr.
Sandig sa Order sang Office of the Ombudsman nga may petsa Agosto 20, 2026, may yara sang bastante nga basehan agud ipadayon ang preliminary investigation kag administrative adjudication sang kaso.
Ang mga gin-reklamo amo sanday:
Fredenil H. Castro – Governor sang Capiz
Jaime O. Magbanua – Vice-Governor sang Capiz
Arthur John H. Binas – Provincial Administrator
Maria Leobeth B. Deslate Delicana – Provincial Legal Officer
Zoe G. Herrera Jr. – Secretary to the Sangguniang Panlalawigan
Ginpahanugutan kag ginmanduan sila nga magpasa sang Counter-Affidavit kag supporting evidence sa sulod sang 15 ka adlaw halin sa tion nga mabaton nila ang order.
Pagkatapos nga makapasa ang mga respondents sang ila Counter-Affidavit kag ebidensya, ang complainant may lima ka adlaw agud magpasa sang iya Reply-Affidavit, upod ang proof nga nabaton ini sang mga respondents.
Ginmanduan man ang mga partido nga magpadala sang kopya sang ila mga pleading kag ebidensya pinaagi sa email sang Office of the Ombudsman.
Ginpaandaman sang Ombudsman nga kon indi magsunod sa ginmando sa sulod sang gintalana nga tion, mahimo ini nga kabigon nga pagbiya sa ila katungdanan nga magpasa sang Counter-Affidavit ukon Reply-Affidavit.
Ginpahayag man sa order nga ang mga motion para sa dismissal, motion for bill of particulars, motion para sa extension sang tion, kag iban pa nga kaangay sa amo nga mga lihok, ang indi pagbatunon sa amo nga kaso.
Bukas ang Bombo Radyo Roxas sa sabat sang mga ginhingadlan.
