Gina-validate na sang Office of the Ombudsman ang report nga ginpasa sang Senado may kaangtanan sa ginaiinitan nga flood control scandal. Ini matapos makumpirmar ni Ombudsman Jesus Crispin Remulla nga nabaton na nila ang report nga naghali sa Senate Blue Ribbon Committee kasunod sang mga hearing parte sa ginapahayag nga anomalya sa flood control projects.
Suno kay Remulla, dako ang mabulig sang Senate report sa padayon nga imbestigasyon agud mapakusog ang fact-finding investigation kag posible nga pagpasaka sang kaso batok sa mga ginatudlo nga responsable sa iskandalo. Ginpahayag man sini nga yara na sa 35 tubtob 45 ka imbestigasyon ang ginadumalahan sang Ombudsman may kaangtanan sa flood control projects.
Dugang pa ni Remulla, ginataas sang Ombudsman ang ila standards sa pag-imbestigar apang indi nila ginahimo nga “weapon” ang opisina batok sa bisan sin-o. Posible man nga may mga kaso nga maipasaka antes matapos ang Setyembre 2026 kontra sa mga personahe kag opisyal nga ginadudahan nga may kahilabtanan sa anomalya kag conflict of interest sa mga proyekto.
