PANITAN, CAPIZ – Nakighinun-anon sa mga opisyal sang Barangay Ambilay, Panitan, Capiz ang Office of the Ombudsman kaangot sa river control project sa ila barangay.
Sa interview sang Bombo Radyo kay Punong Barangay Juan Deita Baulite, iya ginpahayag nga sa ila pagpadulong sa opisina sang Ombudsman,ginpasulat sila sang sworn statement nahanungod sa ila nahibaluan sa nasambit nga proyekto.
Suno kay Punong Barangay Baulite, sandig sa impormasyon sang Ombudsman, ang proyekto ang yara na sa 70% acccomplished apisar daw wala pa sa 10% ang ang natapos sa lugar.
Pahayag pa niya, nagtawag man ang Presidential Anti-Corruption Commission (PACC) agud nga maghibalo sang sitwasyon sa lugar bangud sa portal sang Department of Public Works and Highways (DPWH), ila gindeklara nga yara na ini sa 54. 49%.
Nahibaluan nga sang Agosto 2024, ginsuguran ang nasambit nga mitigation flood control project nga may ginabantay P67 million pesos nga budget apang wala na mapadayon bangud sang rason sang pag-inulan, kag sang Oktubre 2025 lang, ginpundo na ang pag-ubra sa lugar.
Sa subong, nagpadulong naman sa lugar ang contractor agud nga padayunon naman ang amo nga proyekto.
Nagapanawagan man ang natungdan sa contractor kag mga katapo sang Department of Public Works and Highways (DPWH), nga matigayon na nga matapos ang proyekto nga daku gid ang bulig agud makalikaw sa baha ang ila barangay.
INTERVIEWED BY: BOMBO LYND-C JOY BADE VIA BOMBOHANAY SA UDTO
