Nagpasaka na sang supplemental complaint ang mga imbestigador sang Office of the Ombudsman para sa preliminary investigation batuk kay Leyte Rep. Martin Romualdez, anay Ako-Bicol Party-list Rep. Zaldy Co, kag iban pa, bangud sa plunder, direct kag indirect bribery, graft, kag money laundering may kaangtanan sa flood control scandal.
Base sa dokumento, ang Special Panel of Investigators ang nagrekomenda nga pasakaan sang kaso nga plunder, direct bribery, kag graft cases sanday Romualdez kag Co bangud ginaalegar nagbuligay sila kag nagplano nga magkaupod sa paghimo sang ilegal nga mga buluhaton agud makatipon kag makabaton sang kwarta ukon manggad nga nagabalor P56 billion humalin 2022 tubtob 2025.
Sang amo nga tion, nagaserbe bilang House Speaker si Romualdez samtang si Co naman ang representative sang Ako Bicol-Party-list kag chairman sang House appropriations committee.
Sandig sa reklamo, wala lang naga-involve sang ordinaryo nga kaso ang ginhimo sang duha bangud
ginakabig ini nga plunder kag naghatag sang daku nga epekto sa ekonomiya sang Pilipinas.
Ginduso man sang Ombudsman panel ang indirect bribery case batuk kay Romualdez bangud sa kapareho nga akto.
Ginrekomenda man ang money laundering cases batuk sa former house speaker kag kay Atty. Jose Raulito Paras bangud sa pag-transact sang proceeds sang offenses pinaagi sa pagbakal sang propedad sa South Forbes Park sa Makati City.
Dugang pa sang reklamo, ginaalegar may yara sang dako nga pagsaka sa mga transaksyon sa kwarta ni Paras halin 2022 tubtob 2025.
Ang reklamo naggamit sang pagpamatuod ni Roberto Bernardo, anay Undersecretary sang Department of Public Works and Highways (DPWH), nahanungod sa ginatawag nga “flood control scheme.”
Suno sa iya, may mga infrastructure projects nga ginapili, ginahatagan prayoridad, kag ginapondohan kabaylo sang ilegal nga kwarta halin sa mga kontratista kag iban pa nga nakabenepisyo sa mga proyekto.
Ginpahayag man sang panel nga si Co ang isa sa mga proponents nga nalakip sa practices sang tion ni Bernardo sa DPWH kag si Henry Alcantara, District Engineer sang DPWH sa First District sang Bulacan amo ang nagatawag kay Bernardo kag nagapahibalo sa iya nga may ginadala nga kwarta nga amo ang “kickback” para kay Co.
Ang amo nga reklamo ang ginalakipan man sang mga testimoniya sang anay security personnel ni Co nga may yara sang cash deliveries para kay Romualdez nga gina-transport pinaagi sa mga maleta.
Apang ang reklamo nga ini ang indi pa makabig nga kaso sa korte.
Sa proseso sang Ombudsman, imbestigaran anay ang impormasyon, sundan sang paglantaw kun may nagakaigo nga basehan agud ipadayon ang imbestigasyon kag kun may yara sang ebidensya, amo pa lang ang pagpasaka sang kaso sa korte.
Ginpahayag naman ni Elaine Atienza, spokesperson ni Romualdez, nga handa ang kongresista nga atubangon ang bisan ano nga reklamo nga ipasaka batok sa iya.
Sa pihak nga bahin, wala pa gihapon makit-an sang mga otoridad si Co nga nagapangatubang sang mga kaso nga graft kag malversation sa Sandiganbayan.
