Nagpahayag sang pagduhaduha si Ombudsman Jesus Crispin “Boying” Remulla sa kalidad sang mga proyekto nga ginapatukod sang Department of Public Works and Highways (DPWH) para sa nagkalain-lain nga ahensya sang gobyerno.
Sa programa sini, ginpahayag ni Remulla nga mahimo pa nga mas maayo ang pagpatukod sang mga dagko kag komplikado nga proyekto kun ipatuman ini paagi sa public-private partnership (PPP).
Lakip sa ginmension sini amu ang UP-Philippine General Hospital Cancer Center, nga nagabalor sang kapin P9 bilyon. Suno kay Remulla, wala ini nakakuha sang bidder para sa proyekto.
Ginkuwestyon man niya ang Bureau of Immigration building project nga nagabalor sang kapin P8 bilyon. Suno sa Ombudsman, malawig na nga ginapatukod ang amo nga proyekto.
Samtang, ginrekomendar ni Remulla sa National Bureau of Investigation (NBI) nga imbes magpatukod sang bag-o nga building, mahimo nga mangita na lamang kag magbakal sang existing nga building sa pribado nga sektor agud mahimo nga headquarters sang ahensya.
Nagsugot naman si DPWH Secretary Vince Dizon sa pila ka punto ni Remulla, ilabi na sa paggamit sang PPP para sa dalagko kag komplikado nga mga proyekto sang gobyerno.
Suno kay Dizon, mahimo makabulig ang PPP sa pagpasanyog sang mas madasig nga konstruksyon, mas maayo nga kalidad kag mas epektibo nga paggamit sang pondo sa mga proyekto.
Gin-ako man ni Dizon nga indi siya kontento sa kalidad sang pila ka proyekto nga ginapatukod sang DPWH, lakip na ang Bureau of Immigration building.
Samtang, ginpahayag ni Dizon nga bukas ang DPWH sa posibilidad nga untatan ang subong nga NBI building project agud makapangita ang ahensya sang mas praktikal kag episyente nga option para sa iya bag-o nga headquarters.
