Ginpasalig ni Ombudsman Jesus Crispin Remulla nga indi sila ma-impluwensyahan sa nagapadayon nga imbestigasyon may kaangtanan sa flood control scandal.
Sa exclusive interview sa Bombo Radyo kay Remulla, iya ginpahayag nga may pila siya ka mga abyan nga kalakip sa mga akusado, apang ginpahayag sini nga mas importante ang kaayuhan sang pungsod sang sa personal nga relasyon.
Madumduman nga una sini nga ginpahibalo sa publiko nga nagtawag sa iya si anay House Speaker Ferdinand Martin Romualdez agud ipaathag ang isyu sang budget insertions.
Apang ginpanindugan sang Ombudsman nga nakatutok lamang sila sa katuyuan sang imbestigasyon kag pasakaan sa gihapon sang kaso ang sin-o man nga matuod-tuod nga may kaangtanan sa korapsyon.
Magluwas sa anay House Speaker, may iban pa nga ginapahayag nagatinguha nga makaistorya sa iya.
Suno kay Remulla, ang iban sa ila personal niya nga kakilala, himata sang mga abyan, ukon kaupod sa trabaho sang mga kakilala.
Ginpasalig sini, ang ila aksyon ang igabase lamang sa ebidensya kag indi sa anuman nga pangabay sang sin-o man nga personalidad.
