Target ni Ombudsman Boying Remulla nga magpasaka sang kaso sa Sandiganbayan may kaangtanan sa maanomaliya nga mga flood control projects sa Nobyembre 25.
Suno kay Remulla, lakip diri ang mga opisyal sang gobyerno nga may Salary Grade 27 pataas, nga yara sa idalom sang hurisdiksyon sang Sandiganbayan ukon anti-graft court.
Samtang, ang mga kaso nga nagadalahig sa mga indibidwal nga may Salary Grade 26 panubo, upod ang ila ginaalegar mga kaupod, yara sa idalom sang hurisdiksyon sang mga regional trial courts.
Ginsambit man ni Remulla ang report sang Independent Commission for Infrastructure (ICI) nga nagarekomendar sang pagpasaka sang kaso sang plunder, bribery, kag corruption batok kanday Senador Joel Villanueva kag Jinggoy Estrada, anay kongresista nga sanday Zaldy Co kag Mitch Cajayon, kag Commission on Audit (COA) Commissioner Mario Lipana, bangud sang ila pag-involve sa maaanomaliya nga flood control project.
Base sa Salary Standardization Law, ang mga katapo sang Senado kag House of Representatives may Salary Grade 31 ukon nagabaton sang masobra ₱300,000 kada bulan.
Pahayag pa ni Remulla, nakabaton man ang iya talatapan sang preliminary reports may kaangtanan sa 421 ka mga kaso sang flood control projects nga gina-verify na subong.
