Nagalaum ang isa ka online seller sang mga cellphone sa syudad sang Roxas nga madakpan ang nag-scam sa iya nga residente sang Iloilo.
Ginpahayag ni Lorraine Joy Fabrigar 18-anyos sang Barangay Culajao nga wala ini nagdumdum nga mabiktima siya sang scam bangud nangin maayo ang ila transaksyon sang ginreklamo nga si Kristine Joie Canon Lolo sang Pavia, Iloilo.
Nagsugod ang ila una nga transaksyon ni Lolo sang bulan sang Enero sini nga tuig sa diin nagkuha ini sang anum ka mga cellphone.
Sadto nagabayad si Lolo sang mga ginakuha nga gadget rason nga nangin kampante si Fabrigar nga maayo ini nga ka-deal sa iya online business.
Nagsugod lamang ang pagduda ni Fabrigar sang bulan sang Marso nga amo ang ila katapusan nga transaksyon ni Lolo nga nakakuha sa iya sang 90 ka units sang cellphones.
Ini matapos nga ginatug-anan lamang sini ang iya balayaran sa mga nakuha nga gadget tobtob indi na ini makontak.
Sa pagpangusisa man sang tagreklamo natukiban nga madamo na nga mga persona ang natuntuhan ni Lolo.
Naka-angkon man ini sang kahigayunan nga makontak ang live-in partner ni Lolo, apang hugot sini nga ginapanginwala nga may ideya siya kun diin si Lolo.
May nakasugid man kay Fabrigar nga nakita ang presensiya ni Lolo sa isa ka subdibisyon sa Pavia, apang ginkadismaya sini bangud ginbalewala lamang sang mga kapulisan sa lugar ang ila request nga updan sila sa balay nga ginateniran ni Lolo. Samtang desidido si Fabrigar nga pasakaan sang kaso Lolo, apang may ginahulat pa nga dokumento ang tagreklamo nga magapabakud sa ginauyatan nga ebedensiya batuk sa scammer nga si Lolo
