ROXAS CITY, CAPIZ- Gin-suspend na ang tanan nga operasyon sa kalalawran sang probinsya sang Capiz bangud sang Bagyo Opong.
Sa interview sang Bombo Radyo kay Chief Master at Arms Arnel Nisola, Public Information Officer sang Philippine Coast Guard- Capiz, iya ginpahayag nga nagpagwa na sila sang Sea Travel Advisory No. 1 sa diin ginadumilian ang tanan nga mga sakayan pandagat nga magbyahe lakip na ang mga manugpangisda nga nagapalawod.
Suno kay Nisola, kadungan sang pagpaidalom sa probinsya sa Signal No. 1, ginpagwa man ang amo nga abiso.
Pahayag pa nya, nagapadayon ang hugot nga pag-monitor sang mga katapo sang coast guard sa tagsa ka kalalawran sang probinsya agud masiguro ang kaluwasan sang mga pumuluyo.
Dugang pa nya, preparado naman ang tagsa nila ka yunit sa pagresponde sa mga maapektuhan sang amo nga bagyo.
Nagapanawagan si Nisola sa pumuluyo nga sundon ang tagsa ka mga abiso sang mga natungdan nga ahensya agud nga masiguro luwas sa katalagman.
Interviewed by Bombo Sunnie Mae Constantino Batencila
