Ginapadasig ni Capiz Governor Fredenil H. Castro ang pagpadayon sang operasyon sang Capiz Medical Center agud mapadasig ang paghatag sang mas kompleto kag de-kalidad nga serbisyo panglawas sa mga Capisnon.
Suno kay Castro, indi na dapat magdugay ang mga pasyente sa paghulat sang serbisyo, ilabi na sa mga nagakinahanglan sang espesyalista nga konsultasyon, operasyon kag pagbulong sa mas komplikado nga mga balatian.
Ang inisyatibo kabahin sang dugay na nga plano nga mapataas ang lebel sang serbisyo medikal sa probinsya. Sa sini nga tion, madamo gihapon nga Capisnon ang nagakadto sa iban nga probinsya para sa mga serbisyo nga indi pa bug-os nga available sa Capiz.
Ginatarget nga ang Roxas Memorial Provincial Hospital sa Barangay Lanot, Roxas City, ma-develop bilang Level III hospital sa idalom sang Department of Health (DOH).
Paagi sini, ginalauman ang pagpalapad sang kapasidad sang ospital, pagdugang sang mga pasilidad kag serbisyo, kag paghatag sang mas madamo nga oportunidad sa trabaho sa Health Sector.
Suno sa mga report, may suporta man ang DOH sa pagpauswag sang ospital kag sa plano nga mahimo ini nga Capiz Medical Center, nga magahatag sang mas accessible kag comprehensive nga healthcare services sa mga residente sang probinsya.
Para kay Governor Castro, ang pagpauswag sang healthcare system indi lamang dapat makita sa mga plano kag dokumento, kundi sa aktwal nga serbisyo nga mabaton sang mga pasyente.
Ang tinutuyo amo nga mas mapalapit sa mga Capisnon ang kinahanglanon nga serbisyo medikal agud malikawan ang indi kinahanglanon nga pagbiyahe sa iban nga probinsya kag mas mapaayo ang pag-atipan sa mga nagakinahanglan sang bulong.
