ROXAS CITY – Daku ang posibilidad nga mauntat ang operasyon sang Dialysis center sa Roxas Memorial Provincial Hospital kun indi gilayon mapunduhan.
Ginpahayag ni Governor Esteban Evan Contreras II nga wala sang pondo sang 2019 para sa dialysis center gani kun indi mapapasar sang Sangguniang Panlalawigan ang Annual Investment Program (AIP) 2020, posible nga mapauntat ang operasyon kag madamo ang maapektuhan nga mga pasyente.
Apang nagpakig-estorya naman ang gobernador sa mga department heads kun ano ang ila sarang mahimo agud mapadayon ang operasyon sang dialysis center.
Samtang nagalaum si Governor Contreras nga masabat na ang palamangkutanon sang mga katapu sang Sangguniang Panlalawigan angut sa ila ginasiling errors nga nakita sa Annual Investment Plan 2020 sang probinsiya.
Suno sa gobernador nga natigayon na nga ma-validate sang Provincial Engineer’s Office kag pila ka staff nga gintulinan sini ang ginakwestyon nga mga proyekto sang SP.
Ginpahatagan na sini sang kopya ang mga board members, agud maklaruhan kag mapamatud-an nga wala sang duplication ukon double funding sa mga proyekto.
Pananglitan nga indi maaprubahan sang SP ang AIP 2020 sang probinsiya wala sila sang mahimo kundi maggamit sang reenacted budget.
