ROXAS CITY – Naglagda na sa isa ka memorandum of understanding (MOU) ang pamunuan sang Panay Railways Incorporated kag private international firm nga Anametrics Holdings Incorporated nga naba-se sa Malaysia para sa plano nga pagbalik sang operasyon sang train sa Roxas City kag Iloilo.
Ginkumpirma ni Capt. Cesar Capillan, Officer-in-charge sang Panay Railways Inc., ang maayo nga balita kasunod sang MOU signing nga ginpatigayon kahapon sa probinsiya.
Suno kay Capt. Capillan nga isa ini sa multi million project sang Panay Railways Inc., nga ginplanuhan pa sang administrasyon ni anay President Fidel V. Ramos kag posible sa administrasyon pa lamang ni President Rodrigo Duterte mahatagan sang katumanan ang nasambit nga plano.
Pahamtangan sang terminal sa Passi City, Dao, kag Barangay Lawaan samtang ang secondary terminal ipahamtang sa Sta. Barbara, New Lucena Iloilo kag Dumarao sa Capiz.
Nahibaluan nga moderno ini nga train nga airconditioned pa kag maka-akomodar sang 200-300 ka mga pasahero humalin sa Roxas City kag Iloilo vice versa.
