ROXAS CITY – Wala pa sang mandatu sa Philippine Ports Authority (PPA) sa Barangay Culasi, kun san-o liwat magabiyahe ang mga passenger vessel sa syudad sang Roxas.
Ginpahayag ni Erdie Cocoy, PPA manager nga sa karon indi pa mapat-ud ang petsa sang operasyon sang mga shipping companies.
Ang nagabiyahe sa karon amo ang mga cargo vessel nga nagakarga sang cargo trak nga nagaunod sang essential goods.
Kun may nakasakay gid man sa barko, ini sila ang Locally Stranded Individuals kag OFW repatriates.
Apang ginklaro ni Cocoy nga well coordinated ang pag-abot sang mga LSIs kag repatriates sa natungdan nga mga LGUs nga magasugat sa ila sa pier.
Nahibaluan man nga ginatsekyar sang mga personnel ang sulod sang cargo trak antes pa magbiya sa Batangas Port kag pag-abot sa Culasi port liwat ini nga gintsekyar agud masiguro nga wala sang nakalusot nga persona.
Ginpasiguro man sang opisyal nga hugot nga gina-obserbar ang minimum health protocol kasubong sa social distancing, thermal scanning, pagsuksok sang face mask kag paghugas sang kamot.
Pila lamang ini sa mga preventive measure sang talatapan agud malikawan ang paglapta sang COVID-19.
Samtang nagpalab-ot sang mensahe sa mga pasahero si Cocoy nga maghulat lamang bangud wala pa sang biyahe sa karon sa mga passenger vessel.
