ROXAS CITY – Ginhilway na sang Roxas Component City Police Station ang operator sang heavy equipment nga aksidente nga nakalapak sang kaupod sini sa trabaho sa Barangay Dayao, Roxas City.
Ang operator amo si alyas Raffy , 38 anyos kag tumandok sang Sitio Gumawod, Barangay San Isidro, Sibunag, Guimaras kag ang biktima amo si alyas Roy ,42 anyos, tumandok sang Sitio Buwang, Barangay Morobuan, Jordan, Guimaras.
Sa interview sang Bombo Radyo kay Police Chief Master Sergeant Ramil Arcangeles, Spokesperson sang Roxas Component City Police Station, iya ginpahayag nga base sa imbestigasyon samtang ginamaneho ni Raffy ang Pneumatic Tire Roller, wala sini madiparahan nga yara gali sa likod nga bahin ang biktima nga nagabutang sang warning device rason nga aksidente ini nga nalapakan.
Suno kay Police Chief Master Sergeant Arcangeles, gilayon man nga nagresponde ang Roxas City Emergency Respose Team (RCERT) agud nga i-secure ang lugar bangud may bahin sang lawas sini nga naglapta.
Pahayag pa niya, nag-abot man si Roxas City Mayor Atty. Ronnie Dadivas agud matsekyar ang lugar bangud yara sa idalum sang Roxas City Government ang ginapatigayon nga pag-aspalto.
Dugang pa sang natungdan, wala na sang plano nga magpasaka pa ang pamilya sang biktima sang kaso batuk sa operator.
Interviewed by: Bombo Jessa Mae Delos Santos
