ROXAS CITY, CAPIZ- Tuman ang kasubo nga nabatyagan sang operator sang heavy equipment nga aksidente nga nakalapak sa iya nga kaupod sa trabaho sa Barangay Dayao, Roxas City, Capiz.
Ang operator amo si alyas Raffy, 38 anyos kag tumandok sang Sitio Gumawod, Barangay San Isidro, Sibunag, Guimaras kag ang biktima amo si alyas Roy, 42 anyos, tumandok sang Sitio Buwang, Barangay Morobuan, Jordan, Guimaras.
Sa interview sang Bombo Radyo kay alyas ‘Raffy’, iya ginpahayag nga wala nya gid ginlauman nga sa kadugay na nila nga pag-updanay kag kaangay mag-abyan na sila sang biktima, siya pa suno sa iya ang makadisgrasya sa iya nga upod.
Suno kay ‘Raffy’, sa sulod sang anom ka tuig na nila nga pag-updanay sa pagtrabaho, wala man sila naga-away sang biktima.
Pahayag nya, naglain man ang iya nga pamatyag sa natabo sa iya nga kaupod.
Nagapangayo naman sang pasensya si Raffy sa pamilya ni Roy nga magapadulong na subong sa syudad sang Roxas agud nga kwaon ang bangkay sini.
Interviewed by Bombo Jessa Mae Siman De Los Santos
