ROXAS CITY, CAPIZ – Nataban gid sang kawatan ang duha (2) ka cellphone kag bag nga may unod nga kwarta nga ginapanag-iyahan sang isa ka non-teaching staff sa Capiz National High School.
Sa interview sang Bombo Radyo kay Mr. Charlie Begas, Principal sang nasambit nga buluthuan, isa ka miyembro sang LGBTQ ang nagpadulong sa amo nga eskwelahan kag nagpakuno-kuno nga may transaction.
Wala naman suno diri nagpangduha-duha nga ginpasulod sang gwardya ang amo nga persona bangud nagpahayag ini nga may kuhaon nga record sa Admin kag nagpresentar man ini sang ID nga may pangalan NATHANIEL HOBANE.
Base sa CCTV footage sang eskwelahan, makit-an ang LGBTQ member nga nakapantalon kag may ginasipit nga isa ka bag subong man may ginabitbit pa gid nga isa ka bag kag nagalibot-libot ini sa Gabaldon Building kag Admin Building sang Capiz High.
Pagkatapos sini natukiban nalang nga wala na ang bag kag duha ka cellphone sang isa ka disposing officer.
Suno pa kay Mr. Begas nga ang amo nga LGBTQ ang ginasuspetsahan nila nga nagkuha sang bag kag cellphone bangud didto ini halin sa Admin Building base sa kuha sang CCTV.
Bangud sa natabo, gin-meeting ang mga gwardya agud hugtan ang pag-implement sang precautionary measures sa nasambit nga eskwelahan.
