ROXAS CITY – May ginahimo na nga aksyon ang opisyal sang Barangay Milibili, Roxas City may kaangtanan sa reklamo sang pila ka pumuluyo sang Sitio Pamumbungan sa amo nga barangay nga pagbinaha sa ila lugar masobra duha na ka semana.
Sa interview sang Bombo Radyo kay Punong Barangay Annabelle Roxas, ginpahayag sini nga napalab-ot na sa City Government ang amo nga reklamo.
Suno kay Roxas nga may yara na ini sang program of work kag ginahulat nalang ang contractor nga magaubra.
Dugang pa sini nga nasukat na ang area nga pagahimuan sang tamburong kag drainage agud magbulhog ang tubig.
Mahibaluan suno kay PB Roxas nga nagsugod ang amo nga pagbinaha sa lugar sang ginpapaderan sang tag-iya ang subdivision sa diin nahamtang ini sa nabukid nga porsyon sang Sitio Pamumbungan.
Bangud sini, nag-stock ang tubig ilabi na nga ginpa-backhoe pa sang tag-iya ang kilid sang pader rason nga nagatinir ang tubig nga nagaapekto sa mga pumuluyo sa nasambit nga Sitio.
Sa karon, samtang wala pa ginasuguran sang City Gov’t ang pag-ubra sang drainage kag tamburong, hinyuon suno diri ni Roxas sa tag-iya sang aubdivision nga nga dakuon ang buho sa pader para may maagyan ang tubig agud mapahagan-hagan ang pagbinaha sa nasambit nga lugar.
