ROXAS CITY – Ginkuha sang opisyal sang Brgy. Cagay ang pagkahangawa sang publiko sa natabo sang damlag lang sa ila lugar kun sa diin isa ka lilitsonon nga baboy ang nakit-an nga wala na sang unod kag tul-an nalang ang nabilin.
Sa pagpakig-angut sang Bombo Radyo kay Kagawad Isidro Aragon sang Brgy. Cagay, tawo ang may kahimuan sang amu nga hitabo bangud antes sina may pila na ka serye sang kinawatay sa ila lugar.
Dugang pa sini nga sang nagligad lang nga semana may ginsulod nga balay kag ginkawat ang balikbayan boxes kag may ara pa gid sunod nga kinawatay nga wala ma-identify ang suspek.
May ara man suno diri nga nadakpan kag naaktuhan sang tag-iya kag gilayon ginpatawag sa Barangay apang wala mapasakaan sang panumbungon bangud wala sang may pormal nga nag-file nga mga biktima.
Pahayag pa ni Aragon nga subong nga bulan sang Pebrero laban kinawatay sang manok ang nagakatabo sa ila Barangay.
Bangud sini may ginhimo na nga tikang ang mga opisyal sang Brgy. Cagay agud matapna ang kinawatay kun sa diin gin-extend ang pagbantay sang mga Barangay Tanod tubtob sa aga.
