Patay sa engkwentro sang militar kag rebeldeng npa sa Barangay Aglonok, Calinog, Iloilo, ang isa sa mga ginakabig mataas nga lider sang New People’s Army (NPA) sa probinsya sang Capiz.
Base sa ginpaguwa nga Division Public Affairs Office (DPAO) sang 3rd Infantry Division sang Philippine Army, lima ka mga NPA nga napatay sa engkwentro kag isa diri si Rumulo Ituriaga Gangoso alyas Reagan/Pedik/ Randy, kag residente sang Sitio Tuwang-tuwangan, Barangay Bungsuan, Dumarao, Capiz.
Si Commander Reagan ang anay commanding officer sang Eastern Front, Kilusang Rehiyong Panay kag sang Regional Headquarters, KR-Panay.
Wanted man ini sa kaso nga alarm and scandal kag attempted homicide sa Maayon.
Magluwas kay ka Reagan lakip sa mga napatay amo sanday Aurelio Berjes Bosque, alyas Burnok/Bayjan/Sarco/Boy, 57 anyos sang Brgy. Carvasana, Calinog, Iloilo; Jovelyn Silverio, alyas Darlyn/Kaykay/Akay/Porang, kapin 40-anyos kag residente sang Brgy. Patria, Pandan, Antique; Armando Rogelio Sabares, alyas Kamlon/Nene/Kulot/Nono, residente sang Brgy. Igcaratong, San Joaquin, Iloilo; kag Jielmor Gauranoc, alyas Doc/Tango/Baron, 37-anyos sang Brgy. Aras-asan, Sebaste, Antique.
Sa engkwentro nga natabo sa Calino iloilo, narekober sang mga militar sa 12th Infantry Battalion ang duha ka M16 Rifles kag isa ka M203 Grenade Launcher; isa ka Anti-Personnel Mine,mga bala,gadgets kag iban pa nga mga dokumento.
Nagapati naman ang mga militar nga ang kamatayon sang lima ka NPA ang may dako nga epekto sa pagpatuman sang kalinong kag katawhay sa isla sang Panay kag bug-os nga rehiyon.
