ROXAS CITY – Nagahimo na sang pila ka mga tikang si Punong Barangay Cholly Andrade sang Barangay Bolo, agud masolusyunan ang asud-asud nga mga aksidente nga nagluntad sa dalan.
Sa interview sang Bombo Radyo kay Andrade, ginsiling sini nga mapawa ang dalan kada gab-i kag bangud kurbadahon ini kinahanglan nga maghinay sa pagmaneho kag indi pagkalipatan nga magbusina.
Mahibaluan nga yara na sa 6 ka mga aksidente ang nagluntad sa amu nga lugar.
Suno sa Punong Barangay, may yara man sang mga Barangay Tanod nga nagaduty sa ila lugar apang tubtob alas 10:00 ukon 11:00 lamang sang gab-i.
Dugang pa sini nga may yara man sang signage ang amu nga dalan apang, ginkawat ini.
Gani, liwat nga magapahamtang ini sang signage kag butangan na sang suga agud makita sang mga motorista pasulod ukon paguha man sa ila lugar.
Samtang, pagatinguhaan man niya suno diri nga makig-angut kay Plt. Col. Francisco Paguia hepe sang Roxas City PNP agud hinyuon nga kun mahimo magpahamtang sang kapulisan sa amu nga lugar agud magpatigayon sang checkpoint.
Mensahe sini sa mga drayber kag motorista nga kun tani sa tion nga nakainum na sang makahulubog nga ilimnon, indi na magmaneho pa agud malikaw sa disgrasya.
