ROXAS CITY -Ginpahanumdum sa karon ni Dr. Lory Cahilog ang mga opisyales sa barangay sang ila mangin papel sa pagmonitor sa mga Persons Under Monitoring (PUM).
Suno kay Cahilog nga pinaagi sa Barangay Health Emergency Response Team (BHERT) nga ginabug-usan sang mga barangay officials, responsibilidad sini nga i-monitor ang mga PUM nga ila matumod sa barangay.
Kun mahimo nga adlaw adlaw nga bisitahan sang katapu sang BHERT ang PUM sa ila barangay kag tsekyaron ang ila temperatura
Kinahanglan man nga maggamit sang mask ang katapu sang BHERT agud maprotektahan man ang ila kaugalingon.
Pananglitan nga sa sulod sang 14 diyas nga home quarantine kag makita ang flu like symptoms, kinahanglan nga makig-angut ang BHERT sa mga emergency kag response unit kasubong sang CERT sa diin sila ang magadala sa PUM nga makonsidera na nga PUI sa nagakaigo nga ospital ukon facilidad.
Ginpakalma man ni Dr. Cahilog ang publiko nga indi magpanic, bangud sa karon nga sitwasyon, kinahanglan lamang ang kooperasyon sang tagsa tagsa labi na sang mga nag-abot gikan sa Manila, agud indi na maglapta ang virus sa Roxas City kag Capiz.
Liwat ginpahanumdum sang opisyal ang publiko sang paghugas sang kamot sang habon kag tubig sa sulod sang 20 segundo.
Kun matabuan nga wala sang tubig, mahimo maggamit sang alcohol kag hand sanitizer.
Samtang ginpalab-ot ni Dr. Cahilog sa publiko nga likawan ang pag-uyat sa nawong bangud sa karon ang pinakamahigko nga parte sang lawas sang tawo amo ang kamot.
