ROXAS CITY – Maisog nga ginsabat sang mga opisyales sang Barangay Cubay, President Roxas ang pagreklamo sa ila angut sa wala pag-aksyon sa duha ka kalalakinhan nga ginaalegar ginkastigo kag gintayaan sang armas luthang sa isa ka bilasyonan sa nasambit nga lugar.
Suno kay Barangay Kagawad Enrio Centino nga wala tanan sang kamatuuran ang ginreklamo ni Cristina Diaz kun sa diin ang duha ka mga utod sini ang ginkastigo nga sanday Edmar Diaz kag Edar Diaz.
Ginpahayag ni Centino nga matapos nagluntad ang insidente, wala na nila maabtan ang mga suspek kun sa diin kabaliskaran sa ginbuy-an nga mga tinaga ni Cristina.
Wala man sang kamatuuran nga yara si Centino sa lugar kun sa diin natabo ang kinagamo bangud ginpukaw lamang ini sang iya tiayon rason nga nagresponde man ini apang wala na sini naabtan ang mga suspek.
Gin-ako man sini nga matapos ang hitabo, gilayon ini nga nagmando sa pila ka mga indibidwal nga ipauntat ang operasyon sang bilasyonan kun sa diin madamo sang mga ginlapas nga mga minimum health protocols kag pagpatuman sang curfew sa ila barangay.
Naghinyo naman si Centino nga kuntani magsugid lamang sang matuod si Cristina.
Sa pihak nga bahin, ginkumpirmar ni Punong Barangay Leonardo Blancaflor nga matapos nagluntad ang pagpangkastigo sang lima ka mga suspek sa duha ka mga kalalakinhan, nagpadulong pagka-aga sa Barangay Hall sang Barangay Cubay sang nasambit nga banwa ang himata sang mga biktima kag gin-istorya ini.
Dugang pa ni Blancaflor nga ang wala gid ini nagakalipat sa responsibilidad niya bilang isa ka amay sang ila barangay.
Ginpahayag ni Blancaflor nga himata man sini ang pamilya sang ginkastigo kag wala man ini nagakulang sa pagbulig sa mga pumuluyo sa ila barangay.
Ginkompirmar man sang opisyal nga wala sang kamatuoran ang pahayag ni Cristina bangud nagpanugyan pa ini sa tagreklamo kun ano ang dapat nga himuon.
Aminado ini nga ginpanugyanan niya ang pamilya Diaz nga magpadulong sa Barangay Ibaca kun sa diin nagapuyo ang mga suspek nga sanday Jose Lasan Jr., Jornel Lasan, Jefford Lasan, Felizardo Osorio kag Ryan Detaro.
Wala man ini nagpahibalo kun ano ang ginhinalaan sang Pamilya Diaz kag sang mga opisyal sang Barangay Ibaca.
Matandaan nga nagpadulong sa waragwagan sang Bombo Radyo si Cristina kun sa diin ginareklamo ang mga opisyal sang Barangay Cubay matapos wala naghimo sang aksyon sang tion nga ginkastigo kag gintayaan sang armas luthang ang ila pamilya.
