ROXAS CITY – Ginlunsyar ang “Oplan Balik Merkado” sa banwa sang Dao matapos nga nagsaylo ang pila ka mga vendors sa nagkalain-lain nga talipapa sa kabarangayan sang banwa gikan sa ila orihinal nga nahamtangan sa Dao public market.
Sa interview sang Bombo Radyo kay Mrs. Jocelyn Silverio, Associate President sang Dao Public Market, ginsiling sini nga naglalakat ang pila ka mga vendors kabangdanan sang pandemya kun sa diin limitado ang ila pagnegosyo gani nag-ideya ang mga ini nga magsaylo kag magtukod sang ila kaugalingon nga talipapa agud mas damo ang ila mabaligya ilabi na sang mga isda kag utanon.
Bangud diri, naggamay ang mga manugbakal sa merkado publiko bangud man sa indi na kumpleto ang mga produkto rason nga ginhinyo ni Silverio kay Mayor Jimbo Barruela nga pabalikon ang mga nagsaylo nga mga vendors.
Ginhimuan ini paagi sang alkalde kag ginlunsyar ang “Oplan Balik Merkado” kag nagpromisa sa mga magabalik nga vendors sa Dao public market nga hatagan sila sang cash assistance para sa dugang nga capital.
Ginabulubanta 15-16 ka mga manugbaligya ang nakabalik na sa merkado sang Agosto 1 kag nagaamat-amat naman balik ang mga manugbakal.
Panugyan ni Silverio sa mga nakabaton sang bulig pinansyal nga gamiton ang capital sa pagpaumwad sang ila negosyo kag ginaganyat niya ang pumuluyo nga sa merkado publiko nalang magpamakal.
Dako man ang iya pasalamat sa alkalde bangud sa bulig sini kag first time makabaton sang financial assistance ang mga vendors nagikan sa LGU.
