ROXAS CITY – Yara na sa kostodiya sang Pontevedra Municipal Police Station ang kapin sa 20 ka mga motorsiklo kag tatlo ka tricycle nga ginturn-over sang Highway Patrol Group (HPG) Capiz nga nadakpan sa ginpatigayon nga Oplan Lambat Bitag Sasakyan sa banwa sang Pontevedra.
Ginpahayag ni Police Major Peter Bergonio sang HPG-Capiz, gin-impound ang nasambit nga mga salakyan bangud sa paglapas sa laye trapiko.
Kalakip sa mga violation nga nakomiter sang mga motorista ang pagmaneho nga expired na ang lisensiya kag wala sang nagakaigo nga lisensiya.
Sa nasambit nga operasyon kapin sa 104 ka mga motorista ang na-isyuhan sang citation ticket bangud sa magkatuhay nga bayolasyon kasubong sa paglapas sa seatbelt law, indi nagakaigo nga pagdisplay sang plaka kag iban pa.
Nagpanugyan si Bergonio sa mga motorista nga magsunod lamang sa laye trapiko agud malikawan ang multa.
