Ginapabaskog sang Roxas Component City Police Station ang Oplan Sagip Bata agod mapunggan ang mga menor de edad nga nagamaneho sang mga motorsiklo kag iban pa nga salakyan kag malikawan ang posible nga mga aksidente nga mahimo matabo .
Sa interview sang Bombo Radyo kay Police Lieutenant Colonel Rogelio L. Tomagtang Jr., Chief of Police sang Roxas Component City Police Station, iya ginpahayag nga kabahin sa Oplan Sagip Bata ang pagpugong sa mga menor de edad nga nagamaneho sang motorsiklo kag iban pa nga salakyan.
Suno kay Tomagtang,ginahatagan sang impormasyon ang mga ginikanan nga ginadili sa mga menor de edad ang pagmaneho sang motorcycle ukon bisan ano nga salakyan bangod wala pa sila sang driver’s license.
Pahayag pa niya, sa bulan lamang sang Agosto, naglab-ot sa kapin napulo ka menor de edad ang na-plug down sang kapulisan bangod sa pagmaneho sang motorsiklo .
Nagpanawagan man ang natungdan sa mga ginikanan nga indi pagtugutan ang ila mga kabataan nga magmaneho sang motorsiklo ukon iban pa nga salakyan, agod malikawan ang disgrasya kag iban pa nga untoward incidents.
