Padayon nga ginapabaskog sang Pontevedra Municipal Police Station ang Oplan Sagip-Bata agud maprotektahan ang mga kabataan sa peligro sang pagmaneho sang motorsiklo kag iban nga salakyan.
Sa interview sang Bombo Radyo kay Police Captain Maria Fe T. Umiten, officer-in-charge sang Pontevedra Municipal Police Station, iya ginpahayag nga tinutuyo sang operasyon amo ang pagpugong sang mga menor de edad nga nagamaneho nga wala sang lisensya kag nagabiyahe nga wala sang nagakaigo nga safety gear.
Samtang, ginapatigayon man sang talatapan ang regular nga pagpadulong kag inspection sa mga KTV bars kag iban nga night establishments agud masiguro nga wala sang menor de edad, armas, iligal nga droga kag iban pa nga paglapas sa sulod sang mga establisyemento.
Ini ang isa sa mga tikang sang kapulisan kasunod sang insidente sang pagpangluthang sa isa ka KTV bar sa Pontevedra.
Dugang pa sini, ginpabaskog man sang mga kapulisan ang seguridad kag pagmonitor sa mga amo nga establisyemento, lakip ang mas istrikto nga pag-check sa armas kag iban nga delikado nga bagay.
Nagpahanumdum man ang natungdan nga responsibilidad sang tanan ang kaluwasan sang mga kabataan kag komunidad, gani ginapangabay ang kooperasyon sang mga ginikanan, barangay officials, eskwelahan kag mga tag-iya sang establisyemento sa pagpugong sang paglapas kag aksidente.
