Opisyal nga ginkilala sang international food standards body Codex Alimentarius Commission (CAC) ang sardine species nga tamban (Sardinella lemuru, ukon Bali sardinella) — nga mahulik sa Philippine waters — bilang kabahin sang Codex Standard for Canned Sardines and Sardine-Type Products (CXS 94-1981), nga magabukas sang export opportunities sa major markets kasubong sang Europe.
Gin-anunsiyo sang National Codex Organization (NCO) sang Department of Agriculture (DA) kag sang Department of Health-Food and Drug Administration (DOH-FDA), kag ginsapinal sa 47th CAC Session sadtong Nobyembre 25-30, 2024. Ang amu nga event ang magakakas sa trade barriers, magapabakod sa global market access kag magapasanyog sa sardine industry sang pungsod.
Sadtong 2013, natukiban sang mga researcher nga ang Sardinella lemuru ang masami nga nasal-an nga isa pa ka sardine species kag nagtuga sang pagsalangisag. Nangin isyu ini sang ginbalibaran sang European Union authorities ang canned sardine shipments gikan sa Pilipinas bangud ang Sardinella lemuru ang wala nakalista sa ila nga product standards.
Nagresulta ini sa pagkadula sang export opportunities para sa pungsod.
Agud masolusyonan ang problema, nag-lobby ang National Fisheries Research and Development Institute agud ilakip ang Sardinella lemuru sa listahan sang authorized species para sa EU kag global market export.
Sadtong 2020, nagsumiter ang Pilipinas sang hagna para sa pormal nga paglakip sa Sardinella lemuru sa Codex Standard.
Ang hagna gintalakay sa 43rd CAC session, kun sa diin ginmanduan ang Philippine representatives nga magprisintar sang scientific evidence agud suportahan ang tikang. Nagpaidalom ini sa pag-imbestigar kag nag-angkon sang lapnagon nga suporta.
Ang hagna gin-aprubahan matapos ang pila ka tuig nga pagrepaso.
