ROXAS CITY – Wala natublag ang oposisyon sa paandam ni House Speaker Pantaleon Alvarez nga ‘zero budget’ ang mga probinsiya nga indi masguporta sa ginaduso nga federalismo sang ila mga lideres.
Sa exclusive interview sang Bombo Radyo Roxas kay Capiz 1st District Representative Emmanuel Billones Sr., ginpahayag sini nga magapabilin ini sa Liberal Party bisan ano pa ang pagpamilit nga himoon sang Partido ng Demokratikong Pilipino – Lakas ng Bayan o PDP-Laban.
Nagapati ini nga indi maayo nga ehemplo sa isa ka demokratiko nga nasyon ang ginahimo ni Alvarez nga paghingabot sa ila sang mga kaupdanan sa Kamara nga nag-upod na sa ila nga partido.
Kun indi magpanindugan ang oposisyon indi man mabatian ang tingog sang pumuluyong filipinhon kag indi maduso ang interes sang mga pumuluyo.
Ginpahayag pa ni Billones nga indi garantiya nga kun magsuporta ang is ka kongresista sa ginaduso sang administrasyon mahatagan na ini sang pondo.
Ginhalimbawa sang kongresista ang pila ka miyembro sang super majority nga wala nahatagan sang pondo sa [ohak nga nagpabor man sila sa pagpalawig sang martial law sa Mindanao kasubong nanday Ilocos Rep. Imelda Marcos, Davao Rep. Tony Florendo, Samar Rep. Milagrosa Tan kag Rep. Maria Valentina Plaza.
