ROXAS – Mas nangin determinado pa sa karon ang koalisyon sang oposisyon kasunod sang ila nga pagpang-ulihi sa mga senatorial survey samtang nagahilapit ang 2019 midterm elections.
Sa interview sang Bombo Radyo Roxas kay anay Interior Secretary Mar Roxas, ginpahayag sini nga indi mangin upang ang anuman nga survey sa opposition slate, nga ginbansagan nga ‘Otso Diretso’, agud ipakita kag maplastar ang ila mga maayo nga plano para sa pungsod.
Sa baylo nagserbi ini nga ‘challenge’ sa ila suno kay Roxas agud mapatud-an ang ila kaugalingon kag ang ila mga plataporma.
Gin-aku ni Roxas nga nasakitan siya sa tagsa ka makakita ukon makabasa sang anuman nga sahi sang pagpang-bash sa iya apang wala na lamang ini nagapaapekto.
Mahibaluan nga sa ginpaguha nga resulta sang Pulse Asia, si Roxas kag ang re-electionist nga si Bam Aquino gid lamang naggikan sa oposisyon ang nakasulod sa top 12.
Sa ila nga paglibot sa mga kaprobinsiyahanan sa pungsod, ang Capiz, nga home province ni Roxas, ang pinakauna nga ginpadulungan sang grupo.
Kaupod ni Roxas nga nag-abot sa probinsiya kahapon sanday Aquino, Magdalo Representative Gary Alejano, human rights lawyer Chel Diokno, Marawi civic leader Samira Gutoc, former solicitor-general Florin Hilbay, election lawyer Romy Macalintal, kag former House deputy speaker Erin Tañada.
