Nagpatigayon sang protesta sa sulod sang parliament sang Serbia ang mga opposition lawmakers sang maghaboy ang mga ini sang mga smoke grenade kag ang iban ang naggamit pa sang pepper spray agud pamatukan ang gobyerno sa mga korapsyon kag suportahan ang demonstrating students.
Nagtulod ang nasambit nga pagprotesta matapos ipasar sang Serbian Progressive Party ang ila nga agenda nga hugot nga ginpamatukan sang iban nga mga mamamalidha kun sa diin ginsulong sang mga ini ang parliamentary speaker kag nagkinagamo pa sa mga guwardya.
Ang kinagamo sa sulod sang parliament ang nagtuga sang pagka-stroke sang isa ka mamalidha kag ginkapilas sang tatlo ka iban pa.
Nagsugod ang mga protesta apat ka bulan na ang nakakaligad angut sa pagkapatay sang 15 ka tawo sang marumpag ang bug-os nga istasyon sang tren sa Novi Sad.
Bangud sini, naglapad ang mga demonstrasyon nga nagikan sa mga estudyante, nga ginasuportahan naman sang mga manunudlo, mangunguma, kag iban pa nga sektor sa Serbia.
Sa guwa sang parliamento, ginatos man nga mga nagprotesta ang nagtindog sang malinong bilang pagtahod sa mga napatay.
Magalunsyar naman ang mga ini sang dalagkuan nga protesta sa Belgrade sa Marso 15.
Samtang, ginkondenar naman ni Serbian President Aleksandar Vucic ang mga aksyon sang oposisyon kag gintawag ini nga ”hooliganism,” ginpahayag niya nga pasabton nila ang mga responsable sa pagpanggamo.
Apisar may parliamentary immunity ang mga mamalidha sa Serbia, mahimo nila ini nga mabasura kun sila ang mapamatud-an nga involved sa kinagamo.
