ROXAS CITY -Ginaduso karun sang chairman sang Committee on Environment sa Sangguniang Panlungsod ang pagpapasar sang Videoke Ordinance sa siyudad.
Ini ang ginkompirmar ni City Councilor Jericho Celino sang mainterview sang Bombo Radyo.
Ginpahayag ni Celino nga madamo na ini sang nabaton nga reklamo natuhoy sa pagpatigayon sang videoke ukon pagpatunog sang mga sound systems sa kagab-ihon nga nagaresulta sang pagkadisturbo sang mga pumuluyo.
Sandig sa ginaduso nga ordinansa ni Celino, pagadumilian ang pagpatigayon sang videoke ukon pagpatunog sang sound system humalin alas 10 sa gab-e tubtob alas 5 sang aga.
Apang gin-athag ni Celino nga kun may yara sang okasyon, mahimo man nga magkuha sang permit sa barangay.
Nagpaandam si Celino nga may yara sang nakaigo nga penalidad sa mga magalapas sa nasambit nga ordinansa.
Suno kay Celino nga magabayad sang P3,000 nga multa ang mga magalapas nga indibidwal para sa first offense, P4,000 para second offense, P5,000 kag confiscation sang videoke machine para sa third offense.
Natalana naman nga magpatigayon sang committee hearing si Celino agud hinalaan ang ginaduso nga ordinansa.
