ROXAS CITY – Ginpapasar sa sesyon sang Sangguniang Panlungsod sang siyudad sang Roxas ang isa ka ordinansa nga nagamandu sang ‘mandatory’ nga pagsuksok sang face mask kag strikto nga pagpatuman sang physical distancing samtang nagapadayon ang implementasyon sang Enhanced Community Quarantine (ECQ) bangud sang coronavirus disease (COVID-19) pandemic.
Mahibaluan nga nangin author sang nasambit nga ordinansa sanday City Councilors Cesar Yap Jr. kag Albert Gregore Potato.
Sa nasambit nga sesyon, gintingob ang draft resolution sang duha ka mga konsehal para sa pagdihon sang isa ka ordinansa.
Sandig sa nasambit nga ordinansa, obligado ang tanan nga pumuluyo sa pagsuksok sang face masks samtang nagapadayon ang implementasyon sang ECQ.
Hugot naman nga ipatuman ang physical distancing sa mga pumuluyo kun sa diin dapat may antad nga kapin isa ka metro ang kada isa.
Sa idalom sang nasambit nga ordinansa, gina-obligar man ang tanan nga mga establisyemento sa pagpahamtang sang ‘No Face Mask, No Entry’ poster.
May mga penalidad naman nga mahimo atubangon ang sinuman nga magalapas sa nasambit nga ordinansa.
Para sa 1st Offense, mahimo lamang ini nga hatagan sang warning; P3, 000 nga multa sa 2nd Offense; kag P5, 000 nga multa naman kag pagka-priso para sa 3rd Offense kag sa masunod pa nga offenses sang isa ka violator.
