Ordinansa nga nagapasangkad sang mga partisipasyon sang mga pribado nga health facilities sa pagreport, pag-refer kag pagmonitor sang mga kaso sang Tuberculosis ukon TB, pasado na sa Sangguniang Panlalawigan sang Capiz

Aprubado na sang Sangguniang Panlalawigan sang Capiz ang ginaduso nga ordinansa ni Capiz 1st District Board Member Dr. Cesar Yap Jr., nga nagatuyo nga mapasangkad ang partisipasyon sang mga pribado nga health facilities sa pagreport, pag-refer kag pagmonitor sang mga kaso sang Tuberculosis ukon TB sa probinsya.

Suno kay Dr. Yap, importante ang temprano nga pag-diagnose, insakto nga pagbulong kag padayon nga pagmonitor sa mga pasyente agud makontrol ang paglapta sang balatian.

Paagi sa ordinansa, palig-unon ang pagreport sang mga pribado nga doktor kag health facilities sang ila mga pasyente nga may TB, agud masiguro nga ma-monitor kag mahatagan sang nagakaigo nga pagbulong ang mga ini.