ROXAS CITY – Ginasuguran na nga ibalay ang ordinansa nga pagkakas sang mga illegal structures kag fish cages sa kasubaan kag kadagatan sa probinsya.
Sa interview sang Bombo Radyo kay Capiz Vice Governor James Magbanua, ginpahayag sini nga tinutuyo sang amu nga ordinansa agud maproteheran ang mga isda kag panginhason.
Mahibaluan nga isa sa mga nakita nga rason sang pagnabaw sang suba kag dagat ang pagtukod sang mga illegal structures kag fish cages.
Bangud sini, madasig nga nagataas ang tubig rason nga ginatunaan sang pagbaha.
Suno kay Magbanua, panigurado nga may yara sang pila ka mga mangingisda ang magakwestyon sa amu nga ordinansa bangud posible maapektuhan ang ila pangabuy-anan, apang ginapasiguro sang lokal nga gobyerno nga mapadayon ang ila palangitan-an pamaagi sa pagpahamtang sang lugar kun sa diin sila mahimo makapadayon sa pagpangisda.
Sa ginpatigayon nga pagsinapol, kaupod ang Department of Environment and Natural Resources (DENR), Bureau of Fisheries and Aquatic Resources (BFAR), Capiz Provincial Environment and Natural Resources Office (CAPENRO) kag iban pa nga talatapan, nahinalaan kun anu ang problema nga ginapangatubang pag-abot sa kadagatan kag kasubaan sa probinsya.
Partikular nga pagatutukan sang amu nga ordinansa amu ang mga banwa sang Pilar, Pontevedra, Ivisan, Panay, President Roxas kag syudad sang Roxas sa diin may yara sang may malapad nga kadagatan kag suba.
Sa nasambit nga mga banwa, Pilar ang napagkit nga may madamo nga kaso sang illegal nga pagpangisda.
Kaungdan man sa amu nga ordinansa ang pagbaylo sa mga lambat nga may mga magagmay nga buho sa dalagko agud indi maulamid ang magagmay nga mga isda, pagrequired sang business permit sa mga magapatukod sang fish cages.
Ginahinyo sini sa tanan nga magkooperar bangud indi lamang ang probinsya ang makaganar sini kundi subong man ang tanan ilabi na ang mga mangingisda.
