Nagplastar na sang petisyon si Solicitor General Menardo Guevarra agud ipakansela ang birth certificate ni Bamban Tarlac suspended Mayor Alice Guo.
Ang nasambit nga petisyon ginpasaka sa Tarlac City regional trial court (RTC).
Suno kay SolGen Guevarra, ang nasambit nga petisyon bangud napaslawan si Gou nga mag-comply sa legal requirements para sa late registration.
Wala man suno diri nakasumite ang suspendido nga alkalde sang mga supporting documents para sa late registration.
Mahibaluan nga ang amay pa sini ang nagparehistro sang iya nga birth certificate sadtong 19-anyos pa ini.
Gintumod man sini nga madamo sang nanari-sari nga mga impormasyon nga unod ang birth certificate sang alkalde kag mga impormasyong nga nakabutang sa iban pa sini nga mga public records.
Pananglitan nga makansela ang birth certificate ni Gou madulaan na siya sang pinaka-importante nga ebidensya para sa iya kaugalingon nga pagkakilanlan ukon identity.
Samtang, ginklaro naman sang SolGen nga ang qou warranto petition nga plano ipasaka sang OSG batuk sa suspendido nga alkalde indi magadepende sa anu man nga mangin resulta.
