ROXAS CITY – Padayon ang paglibot ni outgoing-governor Antonio Del Rosario sa mga district hospitals sa probinsiya sang Capiz antes magtakop ang iya nga pagpanerbisyo bilang gobernador.
Una diri, ginpadulungan sang gobernador ang Sen. Gerardo M. Roxas Memorial District Hospital sa banwa sang Dao kaupod si Hospital Management Unit Head Melanie Arancillo kag Provincial Administrator Michelle Del Rosario.
Nangin talalupangdon ang mensahe ni Arancillo kun sa diin gintuad sini nga kun mahimo iduso sang pamunuan sang nasambit nga ospital sa masunod nga administrasyon nga dayunon ang gindihon nga proyekto sang administrasyon ni Del Rosario.
Ini amo ang pagpahamtang sang sprinkler system kag dormitory sang mga nurses kag doctors sa nasambit nga ospital.
Aminado man si Arancillo nga diskresyon sang masunod nga administrasyon kun dayunon ang nasambit nga proyekto.
Mahibaluan nga may yara pa nga nabilin nga kapin sa 10 milyones pesos nga pondo para sa nasambit nga ospital.
Ginpatpat naman sang chief of hospital nga si Dr. Ma. Luisa Magsila ang mga nahimuan sang administrasyon ni Del Rosario para sa nasambit nga ospital.
Nagalaum man ini nga kuntani madayon ang plano nga sprinkler system kag dormitory bangud mangin dako ini nga bulig sa amo nga ospital.
