ROXAS CITY –Â Ginkumpirma sang alkalde sang banwa sang Pilar nga nagsuprer ini sang depresyon, isa ka bulan matapos ang May 13 midterm elections.
Sa exclusive interview sang Bombo Radyo Roxas kay outgoing mayor Gideon Ike Patricio, ginpahayag sini nga indi madali nga batunon ang iya nangin kalutusan, labi na nga 24 ka tuig ini nga nagpanerbisyo bilang alkalde sang Pilar.
Aminado ini nga masakit sa iya bahin ang nangin kalutusan bangud ginhimo sini ang tanan agud mapaayo kag mapaumwad ang banwa sang Pilar.
Apang sa bulig sang iya pamilya, mga abyan kag loyal nga mga lideres, amat amat sini nga nabaton ang desisyon sang mga Pilareño nga luyag na ang bag-o nga magadumala sa ila banwa.
Ginklaro man ni Patricio nga bisan san-o wala siya sang may ginbasol sa nangin kalutusan sini sang nagligad nga eleksyon sa diin may nakuha man ini nga leksyon kag may panahon na ini karon sa iya pamilya kag sa ila nga negosyo.
Nahibaluan nga madamo pa kuntani sang plano si Patricio sa ila banwa kun liwat ini nahatagan sang kahigayunan nga maka-serbisyo sa mga Pilareño.
Ginpanginbulahan man sini ang incoming mayor nga si Arnold Perez nga iya bise alkalde sa nangin kadalag-an sini sang nagligad nga eleksyon kag nagalaum nga mapaumwad pa sini ang ila banwa sa iya nga pagdumala.
Samtang wala man naghambal sang patapos si Patricio kun liwat ini magabalik sa pulitika sa masunod nga eleksyon, bangud suno diri nga madamo pa sang posible matabo antes ang tuig 2022.
Nangin halangpon man ang ginbuy-an nga pahayag ni Patricio nga there is no permanent friends and enemies sa patag sang pulitika.
