Ginkumpirma sang Philippine Egg Board Association (PEBA) nga maka-eksperyensya sa subong sang oversupply sang itlog ang pungsod bangud sa manubo nga demand kag pagtaas sang egg producers.
Suno kay PEBA chairman Gregorio San Diego, nagtaas ang produksyon sang itlog sa pungsod matapos nagsaylo ang pila ka hog kag poultry raisers sa produksyon sang itlog nga nadulaan sang kwarta bangud sa pagdamo sang imported nga karne sang baboy kag manok.
Dugang sini nga isa sa mga rason sang oversupply amo ang pagtaas sang numero sang mga layer breeders nga naglab-ot sa 803,000 ka ulo sang nagligad nga tuig, mas mataas sa ginabanta nga 600,000 ka ulo nga kinahanglanon agud masabat ang demand sang merkado.
Sa pihak sini, nagalaum ang industriya sang itlog nga magataas liwat ang demand kag mangin mas malig-on ang presyo sang produkto, kon sa diin magataas ang konsumo sang mga pamilyang Pilipino.
