ROXAS CITY – Padayon ang pag-akomodar sang talatapan sang Overseas Workers Welfare Administration (OWWA) sang pamilya sang mga Overseas Filipino Workers (OFWs) nga registered OWWA members agud makabaton sang calamity assistance matapos nga nahalitan sang bagyo nga Ursula.
Ini ang ginpahayag ni Family Welfare Officer Remon Albeza sang mainterview sang Bombo Radyo.
Ginpahayag ni Albeza nga sa idalom sang programa sang OWWA, mahimo makabaton ang isa ka himata sang OFW nga rehistrado sa OWWA sang P3, 000 nga calamity assistance.
Suno kay Albeza nga humalin sang nadeklarar ang state of calamity sa isa ka lugar, may yara sang tatlo ka bulan ang talatapan sa pag-akomodar kag pag-proseso sang mga magasumiter sang mga rekisitos agud makaagom sang nasambit nga bulig-pinansiyal.
Kalakip sa mga requirements amo ang OFW Membership Sheet ukon OWWA Official Receipt nga may beripikasyon nga ang isa ka OFW ang wala sang outstanding ukon unpaid loan sa OWWA; certification gikan sa Local Government Unit kag National Disaster Risk Reduction and Management Council nga naga-estar ang pamilya sang OFW sa calamity ukon emergency affected area; Passport/Seaman’s Book, Proof of Relationship sa OFW, SPA gikan sa OFW kag Valid ID’s; 1×1 Picture; Proof of Residency – Valid ID of OFW with address; kag white long folder.
