Pormal na nga ginpasidunggan sang House of Representatives ang Filipino pop group nga BINI matapos nga naghimo ini sang makasaysayan bilang pinakauna nga Filipino pop group nga nag-perform sa Coachella Valley Music and Arts Festival.
Kasunod ini sang House Resolution No. 93, kon sa diin ginkilala sang Kamara ang daku nga kontribusyon sang grupo sa pagpasangkad sang impluwensya sang P-pop kag Original Pilipino Music (OPM) sa International scene.
Suno kay House Majority Leader Ferdinand Alexander “Sandro” Marcos III, ang kadalag-an sang BINI nagapakita sang talento kag creativity sang mga Pilipino.
Ginpahayag man sang kongresista nga inspirasyon ang nasambit nga grupo sa mga pamatan-on nga Pilipino nga nagahandum nga mangin kilala sa patag sang musika kag creative industries.
Ang BINI ginabug-usan nanday BINI Aiah, BINI Colet, BINI Maloi, BINIGwen, BINI Stacey, BINI Mikha, BINI Jhoanna kag BINI Sheena. Matandaan nga ang BINI ang nag-perform sang Abril 10 kag 17, sa Empire Polo Club sa Indio, California, kon sa diin ila ginkanta ang pila nila ka hit songs kaangay sang “Pantropiko,” “Karera,” kag “Salamin, Salamin,” lakip ang bag-o nga kanta nga “Blush.”
