Nagapanawagan ang pila ka mga driver sang traditional jeepney sang dugang nga plete bangud sang padayon nga pagtaas sang presyo sang gatong.
Sa interview sang Bombo Radyo kay Rey Oraryo, iya ginpahayag nga kulang ang P1.00 nga pasaka sa plete sa mga traditional jeep bangud nagagamay man ang numero sang mga pasahero nga nagasakay.
Suno kay Oraryo, gamay na lang nga kantidad ang ila nga mapauli sa ila nga mga pamilya agud ibakal sang mga kinahanglanon sa balay bangud daku nga bahin sang ila nga kita ang nagakadto lang sa gatong.
Pahayag pa niya, kun magpadayon ang pagtaas sang presyo sang gatong, may posibilidad nga temporaryo ini nga magapundo sa pagbyahe agud magpangita sang iban nga pangabuhian.
Nagalaum man ang natungdan nga mapadasig ang paghatag sang gahum kay President Ferdinand Marcos Jr. sa pagkakas sang excise tax sa mga produktong petrolyo agud mapahagan-hagan ang presyo sini kadungan sang nagapadayon nga tension sa bahin sang Middle East.
