Nagpain ang Department of Agriculture-Bureau of Fisheries and Aquatic Resources (DA-BFAR) sang P1.06 billion sa masunod nga tuig para sa programa nga magapauswag sa seaweed industry sang pungsod.
Suno kay Agriculture Secretary Francisco Tiu Laurel Jr., ang Enhanced Philippine Seaweed Development Program (EPSDP) ang kabahin sang ginatuyo sang ahensya nga pabaskugon kag hatagan sang pagtalupangod ang aquaculture sector, partikular ang seaweed, nga isa sa gapanguna nga agricultural export sang pungsod.
Suno naman kay Isidro Velayo Jr., Officer-in-Charge sang BFAR, halos katunga sang budget para sa nasambit nga programa ang mangin alokasyon para sa pagpanagtag sang seaweed farm implements, pagpatukod sang 109 nga bag-o nga nurseries, kag maintenance sang 24 seaweed culture areas.
Dugang pa ni Velayo, ang BFAR ang nagpain man sang P10 milyon para sa pagbakal sang bioreactors, nga ginalauman nga magaprodus sang 4,100 metriko tonelada sang propagules, ukon seaweed planting materials para sa masunod nga tuig.
Suno naman sa Philippine Statistics Authority (PSA), ang seaweed industry ang nakaprodus sang mas ukon menus 1.6 milyon metriko tonelada sang sariwa nga seaweeds sang 2023, nga nagtuga sang produksiyon nga nagdangat sa 228,570 metriko tonelada nga may kabug-usan nga balor nga P12.7 bilyon.
Ang probinsya sang Tawi-Tawi ang may 20,000 ektarya sang potensiyal nga seaweed farming areas. Maluwas diri, sa karon, may ara sang kapin 62,000 ektarya sang seaweed farms ang nasambit nga probinsya.
