Narekober sang mga awtoridad ang masobra P700,000 nga balor sang ginasuspetsahan shabu, nagkalain-lain nga armas-luthang, kag isa ka live grenade sa balay sang isa ka Regional Target Listed Drug Personality sa Barangay Bahit, Panit-an, Capiz subong nga aga, Agosto 14.
Ang ginhiwat nga raid paagi sa tatlo ka search warrant gintabangan sang PRO-6, Capiz PPO, kag PDEA-Capiz batok sa 43-anyos nga suspek nga si Kenneth Dorado. Sa interview sang Bombo Radyo Roxas Intelligence Agent V Jury G. Rocamora sang PDEA-CAPIZ, iya ginpahayag nga ginabanta may kabug-aton nga 100 gramos ang illegal nga droga.
Lakip sa nakuha ang isa ka .38 revolver, duha ka PCP long firearm, airsoft replica, kag mga drug paraphernalia. Isa (1) ka unit sang Colt Caliber .45 nga pistola (Serial No. 1254997); isa (1) ka magazine sang caliber .45, lima (5) ka buhi nga bala sang caliber .45, isa (1) ka hand fragmentation grenade PRB 423 (High Explosives), isa (1) ka itom nga hand bag, kag isa (1)ka pula nga eco bag.
Suno sa mga awtoridad, dugay na nga yara sa idalum sang surveillance si Dorado bangud naga-operate ini indi lang sa probinsya sang Capiz kundi pati na sa mga katapu nga lugar. Nakaalerto man si CPPO Provincial Director Police Colonel David L. Cachumbo Jr. nga padayon ang aksyon sang kapulisan agud matapna ang paglapnag sang kontra-droga kag loose firearms sa probinsya. Apang, nakapalagyo ang suspek kag wala sa iya puluy-an sang ginpatigayon ang operasyon.
Sa karon, ginapaidalom na sa pormal nga dokumentasyon ang tanan nga ebidensya samtang padayon ang manhunt operation sang PNP kag PDEA batok sa nakapalagyo nga suspek para sa pagpasaka sang angay nga kaso sa paglapas sa RA 9165 (Comprehensive Dangerous Drugs Act of 2002) kag RA 10591 (Comprehensive Firearms and Ammunition Regulation Act).
