Masobra sa P1.4 milyon nga livelihood assistance ang gintugyan sa 73 ka anay rebelde nga nagdesisyon nga bayaan ang armado nga pagbinato kag magbalik sa sabak sang gobyerno sa ginhiwat nga distribution sa Kapitolyo Probinsyal sang Capiz, Sabado, Hulyo 18.
Ang programa ginpatigayon pinaagi sa pagbinuligay sang Gobyerno Probinsyal sang Capiz sa pagpanguna ni Governor Fredenil H. Castro kag sang Department of Social Welfare and Development (DSWD) pinaagi sa Sustainable Livelihood Program (SLP).
Tag-P20,000 ang nabaton sang kada benepisyaryo nga nagikan sa mga banwa sang Tapaz, Cuartero, Dao, kag Maayon.
Suno sa mga otoridad, ang ayuda mangin kapital sang mga benepisyaryo sa pagsugod sang malig-on, malinong kag produktibo nga pangabuhian para sa ila kaugalingon kag pamilya.
Antes ang pagpanagtag sang pondo, nagtapos anay ang mga benepisyaryo sa Financial Education Training agud mapalig-on ang ila ihibalo sa responsable nga pagdumala sang kwarta kag masiguro nga magamit ang kapital sa mapadayunon nga pangabuhian.
Nagpakigbahin man sa programa sanday Mayor Stephen Chris Openiano, DSWD-6 Assistant Regional Director for Operations Katherine Joy Lamprea, CPPO OIC Provincial Director PCOL David L. Cachumbo Jr., LTC Richard S. Caliva sang 12th Infantry Division, Philippine Army, Therese Mae Auman sang DILG Capiz, Regional Training Officer Choncey Talledo, Daisy Doong sang Kabayan Action Group-CSO, kag PSWDO Head Joerine C. Tan.
Suno sa Gobyerno Probinsyal, kabahin ini sang padayon nga inisyatibo nga maghatag sang oportunidad sa mga anay rebelde agud makasugod sang bag-o nga kabuhi, mapalig-on ang ila pangabuhian, kag mapauswag ang kalinong kag kauswagan sa komunidad.
