Gin-athag sang Philippine Deposit Insurance Corporation (PDIC) nga ang maximum deposit insurance coverage (MDIC) nga P1-million ang igahatag lamang sa mga depositor sang mga nagsarado nga bangko, kag indi sa mga nangin biktima sang scams ukon hacking.
Ang mas mataas nga MDIC epektibo sumugod subong nga Marso. Doble ini sang anay MDIC nga P500,000.
Gindugang ni PDIC Senior Vice President Sandra Diaz nga kun ang isa ka depositor ang nadulaan sang kwarta bangud sa scam ukon na-hack ang iya nga account, ang masunod nga tikang amu ang magpangayo sang bulig gikan mismo sa bangko.
Gin-athag man sng mga opisyal sang PDIC nga ang isa ka depositor nga madamo sang accounts sa isa ka bangko ang makakuha lamang sang maximum nga P1 million, magluwas na lamang kun ang iban nga account ang joint account.
Gindugang nila nga ang account nga sakop sang MDIC amu ang savings accounts kag time deposits.
Samtang, indi sakop ang investment products, subong man ang mga deposito sa sa non-banks kasubong sang mga kooperatiba kag non-stock savings kag loans association.
Ginpasiguro ni PDIC President Roberto Tan sa publiko nga may bastante nga pondo ang PDIC para ma-cover ang tanan nga depositors apisar sa mas mataas nga MDIC. Ang Deposit Insurance Fund (DIF) ang yara sa P237 billion tubtob December 2024.
