ROXAS CITY – Narekober ang binulto bulto nga shabu nga ginapatihan nagalab-ot sa masobra P1 milyon nga balor sa buy-bust operation sa Sitio Ilaya, Dumpsite sa Barangay Sibaguan, Roxas City.
Arestado sanday Florencio Abalayan Jr., 37-anyos, anay trainer sang lawn tennis sa Villareal Stadium, Cherry Jardeleza 34-anyos kag Mark Villanueva 17-anyos.
Sa exclusive interview sang Bombo Radyo Roxas kay Senior Superintendent Samuel Nacion, provincial director sang Capiz Police Provincial Office madugay ang ginhimo nga monitoring kay Abalayan antes ginpatigayon ang operasyon sang Provincial Drug Enforcement Unit.
Ginkumpirma ni Nacion nga ginbuyagyag sa iya ni Abalayan ang pangalan sang tawo nga naghatag sa iya sang droga sa bayan sang Ivisan nga ibaligya sa syudad sang Roxas, apang ipaidalum pa ini sa validation antes mangin target sang operasyon.
Samtang gin-ako naman ni Abalayan nga gikan sa iya ang binulto bulto nga shabu nga narekober sang mga pulis sa iya nga posesyon.
Magluwas sa iligal nga droga narekober man ang mga drug paraphernalia sa posesyon sang suspek.
