ROXAS CITY – Wala pagbag- o sa taripa nga ginasunod sa syudad humalin sang tuig 2020 tubtob subong.
Ini ang ginpahayag ni Joseph Soberano, Presidente sang Roxas Toda sang mainterview sang Bombo Radyo.
Suno diri, padayon ang ila pagsunod nga mga tricycle drivers sa temporaryo nga ordinansa nga ginpatuman sang Tricycle Franchising and Regulatory Unit (TFRU) sang city government nga P10 nga pamasahe sa kada 1 ka kilometro kag dugang nga P5 sa masunod ukon dugang nga 1 ka kilometro.
Matandaan nga ginpatuman ang Ordinance No.: 021-2020 nga nagsugod sang Mayo 7, 2020 kun sa diin ginbag-o ang pamasahe sa syudad may kaangtangan sa paglimita sang pagpasakay sang pasahero bangud sa pandemya nga dala sang Covid-19.
Dugang ni Soberano, apisar sarang pa nila sa karon ang ginasunod nga taripa, indi niya masiguro kun tubtob sa diin asta ang ila ikasarang nga mga tricycle drivers bangud sa padayon nga pagtaas sang gatong amu man ang pagtaas sang mga balaklon.
Pahayag sini, mas maayo nga ginasunod ang taripa agud indi sila mamultahan kun sa diin mas dako ang ila mangin gastos kun madakpan.
Pasugot man ang Toda President kun pahamtangan nalang sang fare meter sang city government ang tagsa ka mga tricycle agud indi man mabudlayan ang mga pasahero kag kaangay nga tricycle drivers sa pagsukat sang distansya sang pagbiyahe kag mangin patas ang pagbaydanay.
