Naghatag si President Ferdinand Marcos Jr sang P100 million nga bulig pinansyal sa lokal nga gobyerno sang General Santos City sa iya pagbisita sa Mindanao matapos ang mabaskog nga linog.
Personal nga ginbaton ni General Santos City Mayor Lorelie Pacquiao ang pondo nga pagagamiton sa renovation sang General Santos City Hall, nga suno sa Presidente, halin ini sa Local Government Support Fund.
Suno kay Pres. Marcos, makabaton man sang P50,000 nga ayuda ang tagsa ka pamilya nga napatayan bangud sang linog.
Nagpasalig man ang Presidente sang dugang nga bulig para sa Sarangani kag South Cotabato para sa rehabilitasyon sang naguba nga imprastraktura sa mga apektado nga lugar.
Ginmanduan man sini ang mga ahensya sang gobyerno nga padasigon ang pagdul-ong sang ayuda kag pagkay-o sang imprastraktura agud mapadasig ang pagbangon sang mga komunidad nga apektado sang kalamidad.
